Letter #2696
Stanisław HOZJUSZ (HOSIUS) to Ioannes DANTISCUSSandomierz, 1543-12-16
| received Heilsberg (Lidzbark Warmiński), 1543-12-24 Manuscript sources:
Prints:
| ||||||
Text & apparatus & commentaryPlain textText & commentaryText & apparatus
Reverendissimo in Christo Patri et Domino, domino Ioanni Dei gratia episcopo Varmiensi, domino colendissimo
Reverendissime Domine, domine colendissime.
Consilium de mittenda instructione mutatum est. Visum enim fuit, quandoquidem res est non parvi momenti, ut in comitiis de ea mittenda consultatio haberetur atque ibi legerentur ea, quae scripta sunt, diligentius. Ita aliud heri, aliud est hodie constitutum. Ego nihilo minus mitto illam Reverendissimae Dominationi Vestrae secus aliquanto scriptam, quam fuit in exemplo illius, sed in eandem tamen sententiam. Si quid emendandum esse putat, scribere dignetur et remittat, quaeso, per suum Psittacum ad comitiorum ingressum.
De vicino contra accidit. Heri fuit res in comitia reiecta. Hodie venerunt tertiae litterae ab illo. Decretum est, ut mitteretur Lasziota reginalis maiestatis cum litteris ad serenissimos fratres. Ita quae deliberatum erat heri mittere, non mittuntur; quae deliberatum erat non mittere, mittuntur; quamquam in privatis causis maiestatis reginalis Lasziota magis mittitur.
Deum precor, Reverendissimam Dominationem Vestram diu servet incolumem. Cuius me gratiae commendo.
Sandomiria, 17 Calendas Ianuarii 1543.
Eiusdem Reverendissimae Dominationis Vestrae deditissimus Stanislaus Hosius cantor et canonicus Varmiensis