Dem Hochwirdigstenn inn Gott Herrenn, herrenn Johann vonn Gotts genadenn des loblichenn stiffs zcu Ermelandt bisschoffe etc., unnserm genedigen herren /

Hochwirdigster inn Got, Genediger Her.

Unnszer bereidtwillige unnd unvordrosszene diennste seindt Ewer Hochwirdige Genaden zcuvoran mit vleis entpholen.

Gennediger Her.

Es hat uns in unnserm mittel unnd radts vorsammelung der gestrenge unnd wolweisze unnszer stadt burggraff unnd geliebter burgermeister, her Johan von Werden, / vorgebrocht, / wie Ewer Hochwirdige Genade an seine gestrengt gesonnen dieselbige ummbe ir gellt mit funffczigk marcken kleine pfennige zcuvorsorgen. / Sich doneben erbiethende solche funffczigk margk in Ewer Genaden namen / vorgedochte kleine pfennige beÿ uns abeczulegen etc.

Dieweill wier denne Ewer Hochwirdige Genaden furderung zo offt unns dasselb vonnothen unnd wier ein solchs beÿ Ewer Hochwirdige Genade gesucht nicht wenig genossen. / Szo hebenn wier Ewer Hochwirdige Genaden mit denselbigen wenigk pfennigen vor ehren wollen. / Welche dasselb in genedigenn willen auffnemen und ein solchs aus unnszer muncz ihr gefallen lossen wolle. / Dan Ewer Hochwirdige Genade in vill mehrem unnd grosserenn zcu dienen seindt wier gewogen. /

Hochwirdigster in Got, Genediger Her.

Uns ist abermols ein eczlich bedrenncknis furgefallen dorane uns unnd villeichte dem gancze lande (wie Ewer Hochwirdige Genade aus bemeltem unserm vilgeliebten herren burgermeister in gnaden wirt haben zcuvornemen) nicht wenigk gelegen. / Dweill wier denne derwegen auff den kunfftigen reichstag gefurdert. / Bitten wier dienstlichen Ewer Hochwirdige Genade aus liebe ihres vaterlandes uns hirinne zcu rathen / und mit genediger furderunge beÿstendigk unnd beÿpflichtigk zcu szein etc. Who unnd inn waszer beÿ falle dieselbe Ewer Hochwirdige Genade vor ihre selbst person adder auch in sachen ihrer genaden kirchen unnsers beistandts widderummbe zcu thuende habenn wurde. / Wollen wir uns Ewer Hochwirdige Genade zcun ehren auch dorin aller gebuer finden unnd vormercken losszen. /

Die wier hiemit dem Almechtigen zcu vorhofften glucklichen tagen lange geszundt mit vleis befehelen. /

Datum Dannczigk, den 30 tag Decembris anno etc. 39.

Ewer Hochwirdige Genade dienstwillige burgermeister und radtmanne der stadt Danczigk