Reverendissimo in Christo Patri et Domino, domino Ioanni Dei gratia episcopo Varmiensi, domino et maiori plurimum observando

Reverendissime in Christo Pater et Domine, domine et maior plurimum observande.

Salutem et studiorum meorum commendationem.

Accepi a Reverendissima Dominatione Vestra rochetam, iusta, ut mihi videtur, longitudine, sed non pari dignitate ornaturam me ac priorem dominum, gratissimum tamen est donum, quo non minus mihi videbor insignis, quam Dinocrates ille Herculis induviis . Sandaliorum mensuram misi paululo porrectiorem pede meo, arbitratus tutius id esse, quam si amussim servassem. Officialis Marieburgensis misit ad me sigillum Reverendissimae Dominationis Vestrae, quo hactenus usus est, quod balneator hic noster Reverendissimae Dominationi Vestrae nunc reddet cum his litteris.

Dominus Hosius hic apud me sesquidiem moratus narravit mihi, quam egregie sit Varmiae a domino Alexandro exceptus, qui cernens fortasse se impegisse, rogavit me, ut cum domino Hosio aliquot mensium indutias paciscerer, intra quas utraq[ue] pars institium servaret Romae. Has dominus Hosius usque ad Kalendas Decembris suscepit, spem simul excludens ullius condicionis suscipiendae, qua litem ipse redimeret. Nam tale quiddam dominus Alexander conatur obque id solum indutias has se ait petere, ut interea causa honestis mediis transigatur per Reverendissimam Dominationem Vestram. Si meis consiliis obsecutus fuisset, non si praecipitasset in haec, quae impendere video pericula, ex quibus non facile se extricabit.

Commendo me favori et benevolentiae Reverendissimae Dominationis Vestrae, quam Deus servet diutissime felicem.

Ex Lubavia, die 9 Augusti 1538.

Eiusdem Reverendissimae Dominationis Vestrae obsequentissimus Tidemannus Culmensis