Reverendo in Christo Patri, domino Ioanni Dantisco episcopo Varmiensi, sincere nobis dilecto

Bona Dei gratia regina Poloniae, magna dux Lituaniae, Russiae, Prussiae, Masoviae etc. domina

Reverende in Christo Pater, sincere nobis dilecte.

Accepimus litteras Paternitatis Vestrae, quibus nobis pro episcopatu Varmiensi, nostra opera ad se delato, gratias agit. Qui animus Paternitatis Vestrae, tam officiosus tamque accepti beneficii gratus, est nobis acceptus ac iucundus. Curavimus autem diligenter, ut Paternitas Vestra ad hunc episcopatum eveheretur, quem illi ex animo favimus cupimusque hanc novam dignitatis et fortunarum accessionem feliciter Vestrae Paternitati evenire. In qua Paternitas Vestra, ut in gratia Domini Dei et hominum benevolentia ad utilitatem ecclesiae suae ac ad rei publicae commodum praesideat multosque annos felix ac incolumis exigat ex animo precamur. Non dubitamus vero, quin Vestra Paternitas novo isto dignitatis gradu et ornamento amplioris fortunae decorata regiae maiestati et rei publicae, uti fidelis ac primarius istarum terrarum Prussiae consiliarius, bene ac fideliter serviet, id quod Paternitas Vestra commodius nunc quam antea facere poterit, cum et opes maiores et maiorem auctoritatem sit consecuta. Quod ut faciat Vestra Paternitas, illam etiam atque etiam hortamur.

Gratum autem est nobis, quod pollicetur Vestra Paternitas mittere nobis velle imaginem serenissimae Isabellae, quam, cum ad nos afferetur, libenter accipiemus et cum iucunditate dono isto Paternitatis Vestrae perfruemur.

Quam sanam et felicem esse optamus.

Cracoviae, die XIII Octobris M-o D-o XXXVII-o.

Commissio propria sacrae reginalis maiestatis