Honorabilis Domine in Christo dilecte. Salutem in Domino.

Intelleximus quosdam annonam nostram aratralem hucusque ad vos non perduxisse. Qua de re generoso domino castellano Culmensi Brodnicensique etc. capitaneo scripsimus, ut auctoritate regia illos nostros debitores ad solvendam ducendamque annonam nostram compelleret. Vestrum itaque erit apud illum nostro nomine instare, ut debitores, quos ei nominatim deferetis, ad satisfaciendum cogat et inducat, pro vestro debito et officio facturi. Bene valete.

Ex castro nostro Lubaviensi, V-ta Martii 1536.