Sigismundus Dei gratia rex Poloniae, magnus dux Lituaniae, Russiae, Prussiae, Masov<i>aeque etc. dominus et heres reverendo in Christo patri, domino Iohanni episcopo Culmensi et generoso Achatio Czeme, castellano Gedanensi et capitaneo nostro Sthumensi sincere nobis et fideli dilectis gratiam regiam.

Reverende in Christo Pater et Generose sincere nobis et fidelis dilecte.

Admisimus iam dudum generoso Lucae de Allen capitaneo nostro Rogosnensi redimere villas nostras Schunewalth, Vidra, Iancowicze et Blumnava in districtu Rogoznensi sitas, de manibus generosorum Stanislai Cashka capitanei Golubensis et terrarum nostrarum Prussiae, thesaurarii magni, procuratoris Mariemburgensis et Mathiae fratris ipsius germani. Volentes igitur, ut negotium huiusmodi redemptionis suum debitum sortiatur effectum, Vestris Sinceritati et Fraternitati commitendum duximus committimusque praesentibus mandan<te>s, quatenus captato inter se certo et competenti ad hoc tempore una simul convenien<te>s accersitisque ad sui praesentiam praedictis fratribus bonorum nostrorum tenutariis, litteras originales, quas se super villas nostras praedictas habere praetendunt, coram se reponi et summas pecuniarum in illis iuste et legitime descriptas per dictum Lucam dari et numerari ac per ipsos tenutarios nostros decreto suo mediante tolli ac levari faciant possessione dictarum villarum nostrarum illos privantes et illam dicto Lucae assignan<te>s pro gratia nostra aliter non facturae.

Datum in Civitate Vilnensi, sexta Martii anno Domini MDXXXV, regni vero nostri XXIX.

Commissio propria serenissimae regiae maiestatis