Unsern fruntlichn grues und was wir liebs und wolgefallens vormugen zuvormm. / Edler, ehrnfester her, gunstiger freundt. /

Wir haben gesternn Ewer Herlichkeit geschribenn, / hoffen, der briff sol euch kurczlich werden. / Underandrenn / hab wir durch unsers bruders schreiben euch lossen anczegen, / das wir euch unser pferd, den schecken von furstlicher irlaucht, gernn woltnn schencken. / Sein ouch genczlich der maynung hoffend, solch guttlich und fruntlich werdet annhemenn. / So bald wir derhalbenn ewer gemuet und willen erlang, wollen euch gedochts pferd zu schicken, / nicht vor ein gebe, / allein das wir unser danckparheit vor vil woltaten euch hiemit mochten etlicher weis kunth thun etc. Der her Danczker castellan hot uns darummb geschribnn, wirt im nicht vordrissen, das es ewer wirt sein etc.

Zu ewer newen herschafft wunsche wir euch gluck. / Newes hab wir euch dis mol nicht zu schreibenn, / dan das wir gernn mit euch und dem hern castellan ein stund lang zu samme woltenn seinn etc. etc.

Hiemit geb euch Got der almechtig langwerige und glukselige gesuntheit. /

Datum Lobau, XX Iulii, anno Domini 1534.