Dem Ehrwirdigen in Gott Herrnn, herrnn Johannes / von Gots genaden / bÿsschoff zcu Cölmensehe etc. / unszerm gnedigen herrnn.

Erwyrdiger in Gott, Gnediger Herre. /

Unszer gutwillige / und behegliche dinste szeint Ewer Gnaden stets bevoran. /

Was uns Ewer Gnade in jungsten iren schrifften / zugefugt / und erinnert, / nemlichen von der bothschafft unde gewerbenn, szo dieselbige / neben dem gestrengen herrnn Achatio Czeme, dantzker castellan, / verruckter tage / beÿ uns / in nhamen lande und stette / die erszamen unszer freunde von Thorn betreffende / abegelegt und angetragen / haben wir woll und zu gutter notturfft eÿngenhomen. Seint auch desselbenn thuens unvorgessen gewest / auch Ewer Gnaden ane czweÿffell gutmeÿnigk anregent / nicht erwaerttet hetten / szunder unszer bedencken langt vor dieszer zeit / derselbigen wolten zugeschrieben habenn. / Who uns nicht diesze geswinde / und fherliche gezeite, / dorczu vil grosse unde uberwende(!) gescheffte / und obligenten, / die uns von allen szeÿten teglich zufallenn / abgehalten hetten. / Wher durch / wir in warheit / der geweldigen hinderlichen maesz / abehalten, / das wir zu demselben handell / in der gestalt, / als das zcur sachen nothwendigk gehoren will und die gelegenheit derselbigen ÿmmers erfordern thut / zu grunde / nicht haben kommen können.

Wollen dennoch keÿnen fleisz sparen / uns / in dem fall / der ymmers / beÿ uns / als der ordenunge des rats alleine / (dweil es privilegia / und freÿheite antreffen wil) nicht kan zu gruntlichen / resolution vorhandelten werdenn / noch aller moglickeiten / erster tage zu bekömmern / und folgende die unszern in die negst kommende convention Stanislai / derwegen mit notturfftigen instruction abfertigen. /

Welchs wir Ewer Gnaden (die Goht lange geszunth und szeliglich enthalten welle <)> / auff gedochte ihre schriffte / zcur andthwert nicht haben willen bergenn.

Datum zu Dantzick, mithwochs negst noch Quasimodo geniti anno etc. XXXIII.

Ewer Gnaden dinstwillige burgermeiste und rathman der stat Dantzick