Reverendissimo in Christo patri et domino, domino Ioanni Dei gratia episcopo Culmensi, fratri et amico carissimo ac plurimum honorando

Reverendissime in Christo pater et domine, domine frater et amice carissime ac plurimum honorande.

Non possum non probare, quod Reverendissima Dominatio Vestra dominum doctorem Reynicium in hunc conventum mittere decrevit, nam etiam sua res agitur in eo, quod Campe apud maiestatem regiam super compromisso ipsum insimulaverit. In qua re si ei adversi quid acciderit, credo, quod domini consiliarii, quorum tunc in eo compromisso conscribendo secretarium egit, ipsum non deserent.

Morbi mei consueti, praesertim calculus et colica, me iterum adeo invaserunt, ut si voluissem in hunc conventum ire, vel etiam, quod minus est, currum conscendere, nequaquam potuissem aut hodie possem. Liberabit me semel (spero) Omnipotens medicus, vel una, vel altera via, his morborum afflictionibus. Alia modo scribenda non occurrunt, quam quod Reverendissimam Dominationem Vestram salvam et felicem esse cupiam, rogans, ut nova, quae ex curia regia vel alicunde alias habet, mecum per opportunitatem communicare non gravetur.

Ex Heisberg, 11 Decembris anno MDXXXIII.

Servitor Dominationis Vestrae in omnibus Mauritius episcopus Varmiensis aegrotus subscripsit