Dem Durchlauchtigen Hochgebornen Fursten und Herren, hern Albrechten, von Gottes genaden marggraffen zu Brandenburg, / in Preussen, zu Stettin, / Pommern, / der Cassuben und Wenden hertzogen, / burggraffen zu Normbergk und fursten zu Rugen, / unserm hochgunstigen lieben herren und freunde /

Durchlauchtiger Hochgeborner Furst, hochgunstiger lieber herr und freund. /

Unsere freuntliche und vleiswillige dienste zuvoran. /

Uns ist diesen tagk Eurer Furstlichen Durchlaucht schreiben / den XI dits datirt worden, / demnach das vidimus betreffende / wir uns wilferig und unbeschwert wollen halten. / Es bedunckt uns aber fueglicher zu sein, / weil wir diese zeit bei unser kirche nicht kommen, / das Eure Furstliche Durchlaucht / das vidimus zu schreiben thet bevolhen / in der form wie das negste, / das Eure Furstliche Durchlaucht gen Crockaw mitgenommen / gewesen, / bei unser kirchen ausgangen / und das solchs mit dem heuptbrieff an uns geschickt wurde. / Alsdan so wir den uberlesen und conferirt hetten, / wolten wir unnser siegell lassen dem vidimus anhengen / unnd weiter unserm capittel aufferlegen / dergleichen zu thun. /

Worinne wir sonst in einem vilgroßern, / Eurer Furstlichen Durchlaucht, der gunst wir uns vleissigck bevelhen, / freuntlich zu dienen wusten / sein wir willigk unnd begirigk. /

Datum Heilsbergk, den XV Novembris MDXLIIII. /

Ioannes von Gottes gnaden bischoff zu Ermlanndt / qui supra manu propria subscripsit