Denn ersamenn unnd namhaftigenn hern burgermeyster unnd rathmann der koniglichen stadt Danntzigk, unsernn besondern, gutten freunden.

Unnsern freuntlichenn grues unnd alles guetts zuvoran. Ersame, namhafftige herrn, besondere, gutte freunde. /

Diessenn thag ist der edell, wolgeborne her danntzker castellenn vonn uns gescheidenn mit dem, / was wyr vor beredung uf Ewer Erbarkeit schreibenn unnd zugeschickte instructionn in den denischenn hendelenn gehabt, / wirt Ewer Erbarkeit von ihm / auch unnser guttdunckenn und wolgemeinten rath, / den ersamenn zwen hernn geladenenn burgermeistern zum bestenn, / bericht annhemenn. / Was hierinne / unnd in dem, das wir negst mit dem erbarnn hern Jorgenn Moller beredt und geschribenn, Ewer Erbarkeit zuthun vor das fueglichste und nutzlichste werdenn annsehen, / stelle wir innhenn eynn roth, / wie das gemeine sprichwort helt, / ist kein geboth. / Wir woltenn gerne, das es in dieser sachen Ewer Erbarkeit alles noch willen ergienge, dartzu unnser guttwilligheit nicht ist abgangenn. / Worinne wir vordann vil liebs und freuntschaft, / darfur uns vil zu dancken unnotig, / zu furdernn, Ewer Erbarkeit, die wir gotlichen gnadenn befelhenn / unnd der guettenn stadt, unnserm vaterland, zu gutt werden vormuegenn, sein wir unbeschwert unnd begirig.

Datum aus unserem schlos Heilsberg, den XVII Decembris M D XLIII.

Joannes, vonn Gots gnadenn bischoff tzw Ermelanndt

Wyr habenn negst inn unsers unmundigenn ohemens Jorgen Scholtzenn sache / ein ckoniglich mandat ann Ewer Erbarkeit lassen gelangenn. / Bittenn derhalbenn uns zubeantwurtenn etc.