Reverendissimo in Christo Patri et Domino, domino Ioanni Dei gratia episcopo Culmensi et ecclesiae Pomezaniensis administratori, domino gratiosissimo

Reverendissime in Christo Pater et Domine, domine gratiosissime.

Servitiorum meorum commendatione praemissa.

Redditae mihi sunt litterae Reverendissimae Dominationis Vestrae de data Luboviae paenultima Februarii, quas sane intellexi nec fuissem cunctatus Reverendissimae Dominationi Vestrae intimare, quo tempore Wistula soluta esset, tametsi hoc anno superius et inferius est soluta, hic vero adhuc glacie tenetur.

Venerunt insuper nudius tertius litterae regiae, indicentes conventionem Marieburgi pro Dominica Iudica, quarum similes Reverendissimam Dominationem Vestram credo suscepisse, ubi cum simul erimus, cons[ulemus], quid facturi sumus, si exspectandus erit nuntius vel responsum Reverendissimae Dominationi Vestrae dandum. Miror, quid prae se ferant invectivae a monacho Pancratio in contione factae, qui alioqui ab hominibus modestus iudicatur, nisi forte a nonnullis instigatus sit, ut aculeum addat, fratre Reverendissimae Dominationis Vestrae praesente, et si persuasionibus obsecundatus est, modestiam non servavit. Certe non verus praeco Evangelii iudicari potest, qui quocumque vento movetur. Sed haec alias.

Cum his me servitiaque mea Reverendissimae Dominationi Vestrae commendata esse cupio. Quam Deus felicissime conservet et prosperet.

Ex Meva, quinta feria Adriani anno 1535.

Eiusdem Reverendissimae Dominationis Vestrae obsequ[entissimus] Georgius a Basen etc. Mevensis capitaneus scripsit