Reverendissimo in Christo Patri et Domino, domino Ioanni Dantisco episcopo Culmensi, serenissimorum regis et reginae Poloniae etc. oratori etc., domino observandissimo

Salutem.

Quid hactenus actum sit de me, scio te cupere plurimum scire. Longe vero praeter opinionem accidit, nam et neque de celeritate quicquam paenitet, et interim non infeliciter cecidit mihi res, vici enim in causa desperata idque aestimo non leve esse augurium rerum bene sucessurarum.

Comitem palatinum Fredericum non inveni Heydelbergae, est enim, ut audio, in Bohemia. Atque interim ego tam fui impeditus in negotio quorundam Brabantinorum, quod mihi fuit iniunctum, ut ad alia ne respirare quidem potuerim. Interim tamen bene cessit conatus primus. Hic nescio, de quo nuntio Turcarum dicitur, qui ad vos venit, de quo miror plurimum neque enim de illo quicquam hactenus audivi, nisi cum huc ad Rhenum venissem. Quicquid id sit, nescio.

Quinta huius mensis primum proficiscar ex Spyra ob negotium, quod mihi hic absolvendum fuit commissum reliqua obiturus suo tempore.

Dignabitur Reverendissima Paternitas Vestra habere uxorem meam sibi commendatam eamque consolari in hac mea absentia, quam spero mihi decori futuram et ad id adnitar, Deus reliqua secundabit.

Spyrae, III-o Iunii anno XV-c XXXI.

Eiusdem Reverendissimae Celsitudinis Vestrae humilis inservitor Cornelius Duplicius Scepperus