GStA PK, HBA, C1 No 794, 2 unnumbered

Dem durchlauchten, hochgebornen fursten unnd herren, hern Albrechten, von Gots gnaden marggraff zu Brandenburg, in Preussen, zu Stetin, / Pomern, der Cassuben und Wenden hertzog, / burggraff zu Normberg und furst zu Rugen, / unserm hochgunstigen, lieben herrenn unnd freunde

GStA PK, HBA, C1 No 794, 1 unnumbered

Durchlauchter, hochgeborner furst, hochgunstiger, lieber her und freundt. / Unser freuntliche und vleiswillige dinste zuvoran. /

Das E(wer) F(urstliche) D(urchlauch)t, wie wir aus derselbten schreiben dat(um) Lick XXIII dits, / welchs wir gestrigs tags uberkommen, / an unserm negsten erbieten / wolgefallen gehabt, / ist uns fast lieb gewesen. / Dem auch also nachzuvolgen sol an uns nichts abgehen, / wie wir auch am jungsten den XXIII dits monts in unserm schreiben an E(wer) F(urstliche) D(urchlauch)t berurt, / der wir mit vleis dancken von wegen der zugeschickten zeitungen, / Got bittend, / die wolde seiner christenheit zu gut / im kortzen endern und bessern / diese beigelegte, / die weitleuftig, wie alles zugangen, / so die villeicht nach nicht an E(wer) F(urstliche) D(urchlauch)t gelangt, / werden auch etwan anzeigen, / das es noch nicht so ferlich sei, / wie das erste geschrei mitgebracht. / Komet die kriegsrustung aus dem reich, / wie angesetzt, / ist nach was guts zuhoffen / vormittelst gotlicher gnad / und hulf, / die wir auch zu angefangenen grentz hendlen / und zu langweriger gesuntheit und aller wolfart E(wer) F(urstlichen) D(urchlauch)t wunschen und bitten, / und uns derselbten freuntlichen gunst bevelhen. /

Dat(um) Heilsberg, den letzten tag Septembris M D XLI.

Ioannes, von Gots gnaden bischoff zu Ermelandt /

qui sup(ra) ma(n)u p(ro)pria s(ub)s(cripsi)t