Dem Erwirdigen in Got, unnsernn besonndern lieben Freundt unnd Nachbarenn, herren Johansenn bischoffen zu Ermelanndt

Hochwirdiger in Got, hochgustiger und fielgeliebter Her und Freunde.

Ich wunsche Euer Lieb zuvor dy gnad Gottes unssers himlischen vatters und hern Iesu Cristi und neben erpitung meiner gancz freuntlichen dinst wes ich auch iederzeit mer libs und guthes fermag.

Thu ich mich gantz freuntlich bedancken Euer Lieb zufiel ubergenumen muchen wes eigen hantschreibens und das si sich so gar hoch freuntlich in angetragen sachen von den erwa... erenfesten Jorgen von Kunheimb koniglicher maiestet unsser aller gnedigen he[rrn] der loblichen Kronen und diser landen zumb pesten mit ra[t]... und erpiten erzeiget, wo ich solchs umb dy selbigen Euer Lieb sampt dem das sich Euer Lieb kegen unsserm rat und davor in allen gnaden bewisen freuntlichen werde widerumb ferdinen und fergleichen konnen sollen auch Euer Lieb alwegen als iren freund erfunden und pit dem nach abermals, wy weil ich weis das es mir von noten gantz freuntlich Euer Lieb wollen meiner dy weil dy selbige von dem hern Danczker kastellan weiter bericht entphahen wurt, dy sachen gemeinen nucz und friden zumb pesten helffen vordern und fertstellen wy ich den nit zweifel, damit allenthalben dy sachen gefordert wurt anne zweifel Euer Lieb Got ein angenemb gut werck.

Den so wil ich auch nit untterlassen Euer Lieb freuntlichen furgwewanten fleis koniglicher durchleuchtikeit zu Denmarckken meinen freuntlichen lieben hern oheim und swager, der es auch an zweifel umb Euer Lieb freuntlich fergleichen und beschulden wurt anzuzeigen, so wil ichs neben dem das Euer Lieb einen sunderlichen rumb pey diser gemeinen lantschafft erlangen wir freuntlichen fe <r> dinen mein liebste gemahel und doch dem sich wes freuntlichen zuentpitens gantz hochlich bedancken mit wunschung in meliori forma alle se[lig]keit und wolfart befelen sich Euer Lieb andechtigen gepete ich p... Euer Lieb mit dy angefangen freuntschafft zwischen uns wy d... pey mir auch beschehen sol freuntlichen) vort und vort und thun lassen.

Befele hiemit Euer Lieb und uns alle gotlicher gnaden.

Datis gantz abends, Kunigsbergk, und mit eigner h[ant], den 21 Novembris anno 1539.

Albrecht m...