Dem durchlauchtigen, hochgebornen fursten und herren, hern Albrechten, von Gots gnaden marggraff zu Brandenburg, / in Preussen, / zu Stetin, / Pommern, / der Cassuben und Wendenn hertzog, / burggraff zu Normberg und furst zu Rugen, / unserm hochgunstigen, lieben herren unnd freunde /

Durchlauchter, hochgeborner furst, hochgunstiger, lieber her und freundt. / Unsere freuntliche und vleiswillige dinste zuvoran. /

Wir haben bei diesem botten Ewer Furstlichen Durchlaucht schreiben neben den abschriften aus dem negst gehaltenem reichstage zu Speier, / auch die copei des brieffes, so die hochgeborne fursten her Johansfriederich hertzog zu Sachssen und churfurst etc. desgleichen her Philips landtgraffe zu Hessen etc. an Ewer Furstliche Durchlaucht gefertigt, / entpfangen / und mit vleis uberlesen. / Dieweil aber solch ansuchen, / wie Ewer Furstliche Durchlaucht melden, / hocher erwegung bedarff / und Ewer Furstliche Durchlaucht hirinnen vortraulicher weis / unsern rath, / den wir bei uns fast klein befinden, / thut furdern / unsern vleissigem gebrauch nach, / wie wir alwegen Ewer Furstlichen Durchlaucht wilferig und freuntlichzudienen unbeschwert zu yeder zeitt uns gerne wolten thatlich beweisen, / ist unsers achtens nottig, / das Ewer Furstliche Durchlaucht (: wie wirs auch dovor halten gescheen sey :) diesen handell erstlich an konigliche maiestet, unsern allergnedigisten herren, / lasse gelangen, / ane der wissen und willen / in diesem zufalh nicht fueglich Ewer Furstliche Durchlaucht etwas sich mag entschliessenn, / so lang der anstandt mit dem Turcken unufgehaben weret. / Auch wissen wir nicht, ob es sich bekuemen will, / das sich Ewer Furstliche Durchlaucht solchs ansuchens wolde annemen, / weil die bei irem geburlichem tittell und nahmen nicht wirt in dem schreiben der stende des romischen reichs angezogen, / sondern schlecht angezeigt, / bei Preussen anzusuchen umb ein ansehenlich kriegs volck zu ross und fues zuerlangen / etc. welchs wir dan Ewer Furstlicher Durchlaucht hochem vorstandt, / weiter dan wirs erwegen mugen, / zubedencken heimstellen. / Es were wol zu diesen ferlichen gezeiten / und widder den gewaltigen und ungleubigen der gantzen christenheit feindt / in das gemein von allen stenden christlichs nahmens was stadtlichs, / und das uff etzliche jar beharre[n] und fortgestelt wurde, / vorzunehmen, / wan Got von himmel sein gnad und einigkeit, die nicht fast hertzlich begert wirt, / wolde geben. / Wir sehen aber die offentliche straff, / die wir allenthalben wol vorschuldt, / vor augen / und sein unser wenig, die sich erkennen / und gotliche barmhertzigkeit anruffen / etc. Dis unser einfeltig schreiben uff Ewer Furstlichen Durchlaucht, der wir uns gerne vorhalten / und zu willen sein / erfordern, / bitten wir uns zu gute wolde halten / und uns in angefangner gunst bevolhen haben. /

Datum bei unser collegiaten kirchen zur Gutstad, / II Iunii M D XLII.

Ioannes, von Gots gnaden bischoff zu Ermelandt /

Qui supra manu propria subscripsit