Dem hochwirdigen in Gott fursten und herrenn herrenn ⌊Johanni von Gots gennaden des loblichen stichts czu Ermelandt bisshove⌋ etc. unserm gnedigen herren.
Hochwirdiger inn Gott furst, gennediger herre.
Unnser bereidtwillige unnd unvordrossene diennste seindt Ewer Hochwirdigste Gnade besundern vleisses zcuvoran entpholen.
Gennediger herr. /
Ewer Hochwirdige Gdanen ⌊⌋ de dato 26 Octobris an uns geshrieben mit dende vonn des herrenn ⌊bisschoves vonn Lesslaw⌋ ⌊⌋ unnd sunst von dem handell durch seine gnade in der ⌊Carthauss⌋ etc. betriebenn, / habenn wir dieser tage entpffangen / unnd lengern innehalts woll eingenemmen / unnd thuen uns erstlich der mittetheilunge desselbigenn bisschofflichenn andtwurths grösslich bedanckenn / unnd dasselbige auch im gleichenn unnd grosseren fall gerne vordinen wollenn. / Dieweill aber Ewer Hochwirdigste Gnade ferner besheidt unnd gelegenheit der ⌊Carthauss⌋ unnd sunderlich von der antzaell der personen czu wissenn bogerett. So habenn wir uns des / unsers bestenn vleisses zcu erkunden nicht underlassenn willen / unnd werdenn eigentlich berichtet, das noch soviell personen als eingelegter zceddell melde in demselbigen ⌊closter⌋ befundenn unnd des die jennigen vorstendere, so durch denn herrenn ⌊bisschoff⌋ vorordent / daz gantze regiment habenn. / Der ⌊pater prior⌋ ist zcu ⌊closter⌋ aber herr ⌊Steffann der scheffer⌋ villeicht sich vordrisses ader sunst beshweres beÿ den lewten besorgende thut / sich alhie in der stadt im carthewsser hoffe enthaltenn. / Es wirth uns auch worhafftigenn berichts angezwigt daz VIII die bestenn pferdenn aus dem ⌊closter⌋ genommen /
unnd wegk seindt. / Die pfortte ader thör des ⌊closters⌋ stehett alletzeidt geschlossenn, also daz niemandt ane szunderlich gewerb dorein kommen kann. / Was uber noch weitter erfolgenn unnd daz ende hievonn sein will, / wirth die zceidt an denn tagk gebenn, / aber nichts deste unnder were / unsers erachtens / nicht unnöttigk daz dortzu io ere io besser also gethann wurde, daz es auff eine andere moess gebracht / eher dem ⌊kloster⌋ (geshwigenn des landes freyheit vorkurzcunge) weitter hinder abbruch unnd shadenn derwegen zcufalle. /
Dortzu Ewer Hochwirdigste Gnade neben andern ⌊herren dieses landes rethenn⌋ reifflich unnd auffs erste zcu gedenckenn geruchenn wolle / unnd thuenn hiermit Ewer Hochwirdigste Gnade dem ewigenn guttigen Gott lange gesundt unnd sseliglich entpholen.
Datum ⌊Danntzigk⌋, 5 Novembris anno etc. 46.
Ewer Hochwirdigste Gnaden dinstwillige ⌊burgermeistere unnd rathmane der stadt Danntzigk⌋
