AAWO, AB, D. 19, No. 43_2

Reverendissimo in Christo Patri et Domino, domino Ioanni Dei gratia episcopo Warmiensi, domino observatissimo

AAWO, AB, D. 19, No. 43_1

Reverendissime Domine, domine clendissime

Officiosissimam servitutis meae commendationem.

Quod scribam hoc tempore Reverendissimae Dominationi Vestrae, nihil est, nisi egisse me cum patre commissario, qui respondit non in domo sua modo, verum et in corde suo se Reverendissimam Dominationem Vestram hospitari velle. Quamobrem quo commode divertat, habitura iam est. Qua de re vero certiorem illam facere possim, quo instructior huc veniat, in praesentia non habeo, nisi quod cum reverendissimo domino Plocensi nihil de hospitibus egerunt vicini nuntii neque fuerunt apud regiam maiestatem praeterquam semel, quo tempore suam legationem exposuerunt. Scripsi cetera fusius per Mauricium. Exspecto nunc, ut coram potius colloqui liceat.

Cubicularius ad Gedanenses missus perhumaniter se ab eis acceptum esse dicit. Dederunt ei apertas litteras, quibus citationem sibi oblatam esse profitentur seque venturos pollicentur. Uno die antequam rediit cubicularius, miserunt per suum huc nuntium Gedanenses citationem ex iudicio camerae contra se missam, quod iuxta comitiorum imperialium decretum subsidia contra Turcas non misissent, magnam sollicitudinem prae se ferentes. Sed eos bono animo esse iussit maiestas regia, maiorem esse sibi necessitudinem cum caesarea maiestate, quam ut metuendum illis quicquam sit, se de ea re tamen cum consiliariis, quos ex terris Prussiae venturos speraret, esse consilium inituram. Deum precor, ut Reverendissimam Dominationem Vestram diu servet incolumem. Cuius me gratiae commendo.

Cracovia, tertio Idus Februarii 1545.

Eiusdem Reverendissimae Dominationis Vestrae servitor deditissimus Stanislaus Hosius cantor et canonicus Varmiensis