Dem durchlauchten, hochgebornen fursten und herren, hern Albrechten, von Gots gnaden marggraf zu Bran[den]burg, / in Preussen, / zu Stettin, [Pomern, d]er Cassuben und Wenden [hertzog, / bur]ggraff zu Normberg [und furst] zu Rugen, / unseren [hochgunstig]en, lieben herren und freunde

Durchlauchter, hochgeborner furst, hochgunstiger, lieber her und freundt. / Unsere freuntliche und vleiswillige dinste zuvoran. /

Underwegens von Heilsberg sein uns diese beÿgebundene von hern Jobst Ludwigen zukommen, / dobei auch von dem hern castellan von Bÿetz etc., der uns des hochwirdigen hern confirmirten zu Lunda unnd Costentz brieff zu Brug in Flandern den XII Iulii negst vorschinnen gegeben, / zugeschickt, / in welchen diese zeitungen, / wie eingelegte zedel ein helt, / beschrieben, / die wir Ewer Furstlichen Durchlaucht nicht haben wollen bergen. / Was sonst in Hungern wirt vorgenohmmen, / und wie romische konigliche maiestet mit acht fenlein knecht / und anderm fussvolck, / dobei dreÿ tausent pferd, vom Hainberg gen Presburg vorruckt, / wirt ane zweiffel Ewer Furstliche Durchlaucht aus hern Jobsten schreiben haben zuvornehmen. / Kompt uns was anders zu, / wolle wir aus dieser tageleistung der hern koniglichen rethe zu Graudentz, / dohin wir den weg genommen, / Ewer Furstlichen Durchlaucht, der wir von Got dem almechtigen alle seligheit wunschen und bitten, / freuntdinstlicher meynung nicht vorhalten. /

Datum aus unserm hoffe Schmolein, den XXV Septembris / M D XL.

Joannes, von Gots gnaden bischoff zu Ermelandt /

manu propria subscripsit