BCz, 1595, p. 106

Reverendissimo domino Iohanni Dantisco, electo Colmacensi, serenissimi Poloniae regis oratori, amico nostro carissimo

BCz, 1595, p. 105

Reverende ac Magnifice Domine, amice carissime.

Litteras Dominationis Vestrae Reverendae, quibus de felici nostro ad comitias Ratisponenses adventu ac bona valetudine gratulatur, legimus, et cum Reverendae Dominationis Vestrae erga nos observantiam iam pridem exploratissimam habeamus, non est, cur illam litteris suis attestari laboret. Condolemus praeterea Paternitati Vestrae Reverendae de adversa illius valetudine, quam omnino nollemus et quam brevissimam optamus.

Psalterium nuper translatum et nobis dono transmissum, animi vestri in nos locupletissimum testimonium, grato animo accepimus.

Ceterum munus consecrationis per Dominationem Vestram Reverendam desideratum ipsi impendere ex animo desideramus et ut illud negotium, propterea quod commodius quam ad proximam diem Dominicam Dominationi Vestrae Reverendae per nos impendi nequit, maturari cupimus, formidamus enim, ne vel impedimenta emergant, ve quibus Dominatio Vestra Reverenda illud recipere seu nos illud impendere alio tempore prohibeamur ac impediamur. Admonitam quoque Dominationem Vestram Reverendam voluimus, quod ut ad munus consecrationis sibi impendendum aptus et idoneus reddatur, necesse erit, ut omnino hac septimana, proximam diem Dominicam praecedente, omnes sacros etiam presbiteriatus ordines recipiat, quos etiam nos eidem, quatenus desiderabat, conferre paratos offerimus. Et Dominationem Vestram Reverendam paper damaged⌈[m]m paper damaged⌉ feliciter valere cupimus.

Vester bonus amicus et frater Albertus cardinalis Moguntinus etc. manu propria