Reverendissimo [in Ch]risto Patri et Domino, domino Ioann[i Da]ntisco episcopo Culmensi, [reg]iae maiestatis Poloniae oratori, domino tamquam patri honorandissimo

Salutem plurimam.

Ex quo abii Bruxella profectus per Arduennam, ea transegi, quae commissa fuere. Verum cum hinc abeat nuntius, ommitere non potui, quin ad te scriberem. Hodie hinc proficiscimur redituri ad vos, ut spero, intra dies X. Interim si quid novi occurrat scriptu dignum, litteras da Ioanni Babtistae de Taxis. Scripsi ad Valdesium de rebus meis, ut eas commendatas haberet domino a Grandtvella. Rogo, ut et tua commendatio interveniat.

Hic in silva rerum novarum nihil habemus neque quicquam videmus praeter steriles campos. Ferina autem commode vescimur liberalitate illustris marchionis Badensis, qui hic agit praefectum caesaris, sed malim apud vos ovilla aut suilla vesci. Pestis hic mirum in modum incrudescit, sed in urbibus tantum, in aliis enim locis non perinde saevit ea contagio, nisi in perquam paucis, ubi tam letalis est aer, ut aves de caelo tactae non secus atque Avernum supervolitantes in terram lapsae exstinguantur. Signa, quae istic visa sunt, hic quoque apparuere magno metu et haud dubio periculo, quod nobis imminens avertat Christus, qui te servet incolumem.

Illustri domino marchioni centum bezo las manos et dominis aliis, et amicis. Apud reverendissimum Leodiensem sis memor mei, nam ille scit, pro qua re instem apud caesarem, et video officiorum rationem non haberi, nisi adsit importunitas.

Ex vico Wallenvilla, XI-o Septembris anno XV-c XXXI.

Dominationis Vestrae Reverendissimae ex animo inservitor Cornelius Duplicius Scepperus