Reverendissimo in Christo Patri ac Domino, domino Ioanni Dei gratia insignis Warmiensis ecclesiae episcopo, domino nostro gratioso

Reverendissime in Christo Pater, eximie domine antistes, domine gratiose.

Studia et obsequia nostra indefessa Reverendissimae Paternitati Vestrae officiose praemittimus.

Ex litteris Reverendissimae Dominationis Vestrae per praesentem suum cubicularium ad nos gratiose scriptis cognovimus, quod Vestra Reverendissima Paternitas (super ista incivilitate venerabilis domini doctoris Ioannis Benedicti, qua et privatis litteris praeter causam in nos invexit, tum etiam reginali maiestati detulit) non solum, ut dignum est, moveatur, verum etiam, quod parata sit in eadem causa innocentiae nostrae suas litteras ad reginalem maiestatem dare et per suum proprium niuntium ablegare etc. De quo Suae Reverendissimae Paternitati in nos beneficio maximas habemus gratias, merituri hoc paratissim <i> s officiis nostris in Vestrae Reverendissimae Paternitatis vota ex sententia destinatis.

De domo domini Alexandri in scholam commutanda necdum scimus, quid constitui potest, nam cum partibus nondum res tractata aut tentata. Si tamen ita posset fieri partium consensu, optimum iudicaremus, ut isto ornamento priorem domus ignominiam detergeremus. Sed exitus acta probabit.

Ceterum de mandato super clandestinis incendiis composito, tum etiam super privilegiis etc. sigillandis, acturi sumus in proximo generali capitulo ad futuram sextam feriam. Hanc dilationem non gravatim Reverendissima Paternitas Vestra admittat, nam hodie sacrum sollemne Divi Andreae Tutelaris Sancti nos istis occupari non sinit.

Lustrationem molae etiam iuxta videre Reverendissimae Paternitatis Vestrae ad Quadragesimam reicimus, tametsi libentius ante hoc tempus eam institui desiderassemus, potissimum ob hoc, ne tractu res abeat in usum et negligentiam.

Cupimus Vestram Reverendissimam Paternitatem ex Omnipotentis misericordia incolumem vivere et ex eadem gratia quam longissime superesse.

Warmiae, ipsis feriis Divi Andreae anno 40.

Eiusdem Reverendissimae Paternitati Vestrae obsequentissimi praelati, canonici atque capitulum ecclesiae Warmiensis