Reverendissimo in [Chris]to Patri et Domino, domino Ioanni episcopo [Cul]mensi, serenissimorum Poloniae regis et [regi]nae oratori etc., domino tamquam patri honorandissimo

Salutem.

Doleo vehementer, quod nescierim te Gandauum venturum fuisse ante hos dies sacros, exspectassem enim neque tantum accelerassem reditum, sed spem, quam semper habueram, ademerat mihi illustrissimus marchio transacturum te dicens Pascha Antwerpiae, quod mihi vero propius videbatur. Ex quo autem caesar non ita brevi venturus est Gandauum, quid oberit, si cras huc ad nos venias, itinere non adeo longo et quod sex horis etiam pedes quis absolvat? Idque ut facias, oramus vehementer.

Visurus es, ut alia omittam, globum magnum et quo nullum maiorem vidisti umquam neque tam bene depictum. Ego rursus te comitabor Gandauum, cumprimum caesar advenerit. Interea non deerunt alia spectatu digna, quibus tempus fallemus. Proinde, si quid possunt preces meae uxorisque et amicorum aliquot, qui hic sunt, oro te vehementer, ut huc venias. Satis futurus es Gandaui, cum redierit caesar, interim te aliis imperti. Quod si etiam in animo habes hinc in Zelandiam traicere, brevissimus erit traiectus iste et ego te non patiar solum traicere, tantum veni de reliquo acturus pro arbitrio.

Litteris Ciceronianis conabor respondere, si quando sese mihi facilem(!) praebiturus est Cicero.

Commendat sese tibi uxor et soror orantque, ne tardes diutius.

Brugis, die XV-o Aprilis anno XV-c XXXI.

Eiusdem Dominationis Vestrae Reverendissimae humilis inservitor Cornelius