Reverendissimo in Christo Patri et Domino, domino Ioanni Dei gratia episcopo Culmensi, fratri et amico carissimo ac plurimum honorando

Reverendissime in Christo Pater et Domine, amice praestantissime fraterque plurimum observande.

Salutem et omnis felicitatis accessum cum sui recommendatione.

Ultima Octobris redditae mihi per praesentium exhibitorem fuere litterae Reverendissimae Dominationis Vestrae recurantes non mediocriter meum animum testantesque ipsam incolumem meliori dispositione corporis, quam Elbingi fruebatur, domum venisse. De quo gratulor Vestrae Reverendissimae Dominationi candido affectu mihique gaudeo, utque Dominus Deus eam longaeve ita servet et ad maiora exaltet, asservanter precor.

Cum litteris regiis iuvenem, quem magnopere mihi Reverendissima Dominatio Vestra in servitium meum commendavit, ad regem hodie vel perendie destinabo et, ut litteras sub fide perferat et praesentet, illi severe iniungam, atque ut pari cura responsa expostulet, modo sacram regiam maiestatem Vilnae comperiat, nam relatum fuit Elbingi, quod rex in itinere parumper subsistere decrevisset. Utcumque modo Deus suam maiestatem vigentem conservet et ego a male affectis fratribus pro labore gratitudinem et non persecutionem reportem.

In novis nihil habeo, quae Vestrae Reverendissimae Dominationi incomperta sunt.

Quam Deus, cupio, quo felicissime protegat et in longos, felicissimos annos ad vota sospitet.

De reliquis cancellarius meus Reverendissimam Dominationem Vestram certiorem reddet.

Ex Helsberg, 2-a Novembris 1535.

Reverendissimae Dominationis Vestrae sincerus frater Mauritius episcopus Varmiensis manu sua