BCz, 403, p. 40

Dem Erwirdigen in Gott unserm besondern lieben freundt unnd nachparn herrenn Johansenn bischoffen zu Ermelandt

BCz, 403, p. 39

Unnser freuntlich dinst zuvorn.

Erwirdiger in Gott besonder lieber freundt und nachpar.

Wir haben an E(uer) L(ieb) gegenwertige die erbarn und hochgelertten unsere rethe unnd liebe getrewe Cristoffen von Kreÿtzen, heuptman zu Tapiaw, / und Franciscum Tege der rechte doctorn etc. abgefertigt / und E(uer) L(ieb) in unserm nhamen allerleÿ und unsere inen mitgegebene bevelch anczuzaigen auferlegt. / Ist hirumb unser freuntliche bitten, / E(uer) L(ieb) wollen dieselben unsere gesandten gutwillig horen, / ÿnen volkommen glauben geben, / als unser eigen person auff dismal geben. / Sich auch daruf unnser zuvorsicht nach freuntlich nachparlich unnd whilferig erweÿssen. / Das seind wir in gleichem und mherern umb E(uer) L(ieb) freuntlich zubeschulden urbuttigk.

Dat(um) Konnigspergk, denn XIX Aprilis anno etc. im XLVI.

Von Gots gnaden Albrecht marggraff zu Brandenburgk, in Preussen, zw Stettin, Pomern, der Cassuben und Wenden hertzog, burggraff zu Nurmbergk und furst zw Rugenn manu propria subscripsit