Dem durchlauchten, hochgebornen fursten und hern, / [hern] Albrechten, von Gots [gnaden] marggraff zw Brandenburgk etc. und herczog in Prewssen, / unserem freuntlichen, lieben hernn und nachparnn /

Durchlauchter, hochgeborner furst, freuntlicher, liber her und nachpar. / Unser freuntliche dienst / und was wir sunst liebs und wolgefallens vormugenn, zuvoran. /

Wir haben negst Ewer Irbarkeit gloubs briff von dem edlen und vhesten hern Cristoffen Gattenhoffen, Ewer Irbarkeit kammer meister, / donebenn ouch alle gewerbe, / die im Ewer Irbarkeit an uns mit gegebenn, erhalten und mit grossem wolgefallen vorstanden. / Bedancken uns mit hochem fleis gen Ewer Irbarkeit des freuntlichen, geneigten willens und sunderer gunst, die Ewer Irbarkeit zw uns haben. / Wollen uns ouch so darinnen / halten und erczegen, / das solche gunst wachssen / und in keÿn abnhemen komen sol, / derwegen wir ouch gedochtem Ewer Irbarkeit kamermeister ( den wir von wegen seiner tugendt, vorstandt und viler erfarenheit inn sundere lieb angenomen ) unser gemuet und dinstlichen willen gen Ewer Irbarkeit, ouch wie wir zw der coadiutoreÿ und andre gesindt, / vortrawlich entdackt / und Ewer Irbarkeit anczwtragen gebetten, / doneben ouch was den scheffer uff Marienburgk Kostken, / der sich freuelich und stolczlich, / sunder ursache, / wider uns geseczt und erhaben, / wie dan Ewer Irbarkeit aus dissem irem kamermeister weitlofftig wirt horenn und vorsthen. / Bitten derhalben freuntlich, Ewer Irbarkeit wolde im in den oben geschriben sachen und unsern begeren / widerumb, / so wie wir in Ewer Irbarkeit nhamen gethon, / volkommen disz mol gloubenn geben / und sich so gen uns beweisen, / wie wir dan zw Ewer Irbarkeit besunderen und starckenn vortrawen tragen. / Das wolle wir umb Ewer Irbarkeit, die wir Gote dem allemechtigen in gelugseliger regirung und langweriger gesuntheit thun befhelen, / alweg zw beschulden pflichtig sein. /

Datum uff unserm slosse Lobaw, XII Decembris anno domini 1533.

Joannes, von Gots gnaden bischoff zw Culmen, administrator des bischtumbs Pomezan / qui super manu propria scripsit ... dedit