Ioannes von etc.

Unsernn bruderlichn grues zuvorann. / Erbar, liber bruder.

Wir schicken dir dissen unsernn goltsmit, / dem solt du alles lossen kouffen, was er zu seinenn wesen bedarff und beczalen, / dasselbte alles und in mit dir her brengen. Das du die II pferde kuofft hast, / trage wir ein gefalln. Thu fleis, das sie gesunt her komenn. / Umb den stelenn geczeug handel, das wir in mochtnn habenn, / wie wir dir befolenn. Hab ouch gut achtung, das unser svester kinder sache wol werd der billigheit noch / angerichtnn. Kouff zu X parenn recht gesnitten korken holcz, / und nicht wenig svarcz zcwirn nheseiden, / und anderer farben roth, / braun, / bloe, / und ghel, / ein gut anteil sich ouch indert ummb {umb} ein, II oder III amen guts reinischen weins, / und was dir zuvor befholen, / ouch was du erkenst von buchernn, molwerk, das uns muge angenemm sein. / Grusse unser frund Macz Platenn mit seiner hausfrawenn und dem gancznn geslecht, / der gleichen thue ouch al unser freuntschafft. / Wir werdenn von furstlicher durchlaucht geladen uff ein ehefreud gen Konsberg uff zukunfftig Sankt Bartolomei tag, / das wir nicht mugenn abslaen. / Mussen uns ein mol mit furstlicher durchlaucht sehen und bereden. / Derwegen bring II rethe lundische tucher mit, / von den groen nym mit dir ein muster, das wirs sehen mugen, / und erfar den kouff. / Hiemit Gote in gesuntheit befolenn und kom bald wider.

Datum Heilsberg, III Augusti MD XXXIX.