Unsern freuntlichen grus und aller guts zuvoran. / Ersame, namhafftige herren, besondere, gute freunde. /

Wir haben in der widderfart von unsern lieben bruder und schwestern / und andern unsern lieben getrewenn, den edlen, ernvhesten und gestrengen Hansen Glaubitz, unserm schwager uff Seheburg, / Jorgen Proken, ritter, unserm landvogt uff Braunsberg, heubtleuten Philippen von Potritten / und Niclassen Plotowski, welche wir vor unser person zu ehren unserm lieben bruder, dem erbarn, ernfesten Jorgen von Höue[n], anders Flachsbinder, / unserm heubtman zu Ressel, / uf sein ehefreudt negst mitgegeben / und von unsrem wegen zugeordent, / Ewer Erbarkeit freuntlich gemut, / wie das in im selbst wol angemerkt und vorstanden, / in dem das in uns zu ehren, ouch der braut, / wie eins borgermeisters tochtern und eins borgermeisters nochgelosne witwe mit Ewer Erbarkeit beywesenn, vil freuntlicheit / mit ander gastlicher voreherung und wolthat bewiesen, / dovor wir Ewer Erbarkeit, / umb die wir solchs nicht vorschuldt, / billichen danck wissen / und zu wissen in kein vorgessen wollen stellen , / wie wol es die nottorft nicht erfordert, weil die uns ... von uns, / was zu irer underhaltung uff solche ehefreude gehorig ire vorsorgung genugszam mit sich hettenn. Nichts weniger dermassen freuntlicheit gen uns und gunst gen uns und die unsern , wolle wir in zukunftigen zeiten Ewer Erbarkeit, / die wir gotlichen gnaden bevelhen, / zuerstatten, / so vil muglich, / nicht underlassen. /

Datum 24 Septembris M D XLII.