Reverendissimo in Christo Patri, domino Ioanni Dei gratia episcopo Culmensi, amico honorandissimo

Reverendissime in Christo Pater et Domine, amice honorandissime.

Doleo plurimum illatam Dominationi Vestrae Reverendissimae contumeliam ab improbis et stolidis hominibus, Christianam fidem contemnentibus, contra quos ut agi et poena promerita decerni possit, maiestas regia conventui isti Prutenico proxime futuro cognitionem eius negotii et poenae imponendae auctoritatem committere et demandare dignata est, in quo conventu Dominatio Vestra Reverendissima de laesa dignitate sua contra istos audaces fidei contaminatores actionem ad vindictam instituere poterit.

Gratulor primum Dominationi Vestrae Reverendissimae ob susceptum recens religionis nostrae sacerdotium et opto, ut reliquo pastoralis officii munere propediem exornetur, in quo si quid opera nostra effici possit Dominationi Vestrae Reverendissimae gratum, praesto sum semper illi futurus.

Brevi hinc maiestas regia discedet in Lituaniam, quam ego Deo bene volente conducam usque in Radom et illic postmodum in bonis episcopatus mei aliquantisper subsistam.

Ego nunc ex febre tertiana laboro, quam etsi iam mitius mecum agere sentio, egredi tamen domo, nisi bene confirmatus, non potero. Nova nunc non sunt nobis ulla scitu digna et ea, quae sunt, per aegritudinem a me scribi non possunt.

Commendo me amori et benevolentiae fraternae Dominationis Vestrae Reverendissimae, quam sanam et semper felicissimam esse ex animo opto.

Datae Cracoviae, ultima mensis Aprilis anno Domini M-o D-o XXXIII-o.

Vestrae Reverendissimae Dominationis Petrus episcopus Cracoviensis et vicecancellarius subscripsit