Magnifico Ioanni Dantisco iuris utriusque doctori, secretario et oratori nostro sincere nobis dilecto

Sigismundus et Bona Dei gratia rex et regina Poloniae, duces Lithuaniae, Russiae Prussiaeque etc. domini

[M]agnifice sincere nobis dilecte.

Quidam ex nostris benevolis nobis ex Mediolano per litteras de[nu]ntiarunt illustrissimum ducem Mediolani sollicite agere apud caesaream maiestatem, ut ducatum [no]strum Barensem recipi faceret in sequestrum et nobis illum adimeret. Nesci[m]us, sub cuius iuris [pr]aetextu, quo niti velle dicitur, ut hanc hereditatem adeat tamquam sibi debitam, quam tamen ...s non ignoramus tam certo et iusto iure nobis deberi, ut nihil posset esse certius, quemad[mo]dum hoc litterae et privilegia nostra declarant. Scribimus hac in re ad caesaream maiestatem, cuius [in]terest, et nos in iure nostro conservare, et tueri nos, ne quid importune et violenter contra [no]s fiat ad diminuendam vim iuris nostri, in quo ne quid impedimenti ab eodem domino duce [Me]diolani habeamus, mandamus tibi, ut mox privilegia donationis et confirmationis ipsius du[ca]tus nostri Barensis transcribi cures ac cum eorum exemplis te ad maiestatem suam caesaream [in] Hispaniam recipias agasque nostro nomine et roges illam, ut in primis iustitiae, quam eni[xi]ssime colere dicitur, rationem habere dignetur ac demum benevolentiae a[m]orisque nostri mutui, [qu]em inter maiores nostros et item inter nos sanguinis et affinitatis coniunctio conciliavit [ne]c permittat aliquid impedimenti nobis in ipso ducatu vel eius possessione afferri. Quia ...co magnificus dominus Mercurinus de Gatinaria supremus cancellarius maiestatis suae caesareae, cuius [op]era nos, ut scis, in rebus nostris uti solemus, dicitur in Italiam adventare, volumus ita iter [tu]um in Hispanias dirigas, ut venire illi obviam possis. Cui hoc nostrum negotium diligenter ... commendes et roges ita illud stabilire velit, ne qua difficultas ac iniuria nobis in [iu]re et iustitia nostra oboriatur. Omnia autem agas tam apud caesaream maiestem quam apud [ali]os, quae et tempus et necessitas suppeditabit. Eius rei ex animi nostri sententia ita perfi[cien]dae, ut nulli deinceps procellae obnoxia esse possit, in qua ex rerum successu et eventu [con]silia captabis eaque dexteritate uti curabis, ut in primis fidem, d[ilige]ntiam atque indu[stri]am tuam merito commendatam habeamus, et deinde labores tuos ... digno praemio [com]pensandi iustam causam habeamus.

Datae Cracoviae die d[ecima Iun]ii, anno Domini [M-o] D-o XXIIII-to, regni nostri anno XVIII-o

Sigismundus rex subscripsit

Bona regina subscripsit