Reverendissimo in Christo Patri et Domino, domino Ioanni Dei gratia episcopo Culmensi, domino et patri gratiosissimo

Culmense

Reverendissime in Christo Pater et Domine, sanitatem et felicitatem omnem cupio Reverendissimae Paternitati Vestrae tamquam patri gratiosissimo.

Sciat suas maiestates hinc versus Lithuaniam egressas ipso die Francisci et tertia huius Critio archiepiscopatum, Choienszky Ploczensem, Gamrath Premisliensem episcopatum contulisse.

Iussit et mandavit regia maiestas mihi, ut cum episcopo Cracoviensi ydropico quattuor hebdomadas manerem, diligentiam facerem cum doctoribus, quamvis non sit opus quattuor, non dico, septimanarum, nec mensem Christus unum curavit. Faciam, quod Deus voluerit.

Georgius Miszkoszky sequitur regiam curiam, herr reicht den broten. Quid futurum sit. Deficient docti viri, deerunt praedicatores, praesertim et quia Reverendissima Paternitas Vestra bonum virum Casparem Lysz[man], nescio quo errore notavit et eam ob causam rogo et obtestor, velit eundem sacerdotem ob veterem nostram et sinceram, non aulicam, amicitiam in gremium et collegium suae Reverendissimae Dominationis excipere bonamque spem eidem praebere, quoniam hoc faciens congeret carbones ignis super caput eius, si excessit et agnoscet meam commendationem non fuisse vulgarem. Non occidat sol super iracundiam vestram, omnes enim mutabilitati obnoxii sumus. Et ita quando, Deo bene favente, ad altiora fastigia cathedrae episcopalis conscendet, cur eum ab ecclesia Culmensi repell[ere] velit, non video.

Reverendissimus Choienszky praeter et contra voluntatem reginae nactus est episcopatum Plocensem, plorabat enim amaritudine ducta, quod aliter, quam optabat, res cederent. Voluit gratiam agere reginae, dixit quia non est opus nec haberet ei pro quo gratiam agere.

Ego cuperem ire Warmiam hoc anno, si Deo placuerit, ubi nostro[s] amicos alloquemur et ad sedem Reverendissimae Paternitatis Vestrae declinabo omnino, modo intelligam dominum Casperem in gratiam Reverendissimae Paternitatis Vestrae rediisse per commendationem meam.

Valeat itaque felicissime et me diligat.

Datae Cracoviae, 4 Octobris, qua die rex exivit Cracoviam, 1535.

Eiusdem Reverendissimae Paternitati Vestrae Ioannes Benedicti regius doctor, scripsi obsequentissimus