Dem Erwirdigen in Gott, unserm besondern lieben Freundt, hern Johansen bischoffen zu Colmsehe und postulirten zu Ermelandt /

Dy gnad Gottes unssers hern Iesu Cristi.

Hochwirdiger in Got, freuntlicher und fielgelobter her Freund und Nachpar.

Euer Lieb sey zuvor mein gantz freuntlich dinst wes ich auch iederzeit mer liebs und guts vermag.

Bedanck ich auch gantz freuntlich Euer Lieb eigen gethanen hantschrifft den 3 Octobris aus der dagfard zu Graudenitz dy mitpringt ein entschuldigung des kurczen schreibens und pitten, das ich mer das vor lang zugethan gemute kegen meiner person in gunst und gutwilligkeit anfurenn wol. Welher ... zugethanen gutwilligkeit ich mich gantz hochlich und freuntlich thu bedancken den mer auch solche lieb hochwirdiger zuscheczen auch aus danckparer gedechtnus nit zulassen, den ab alles papir so in Preussen auch an allen andern orten moglich zumachen volgeschriben were und ist solcher freuntlichen danck[sa]gung der frolockung Euer Lieb glucklichen vortsetzung aber translation kegen ... gantz nit von noten den von Euer Lieb auch mein geliebter zukomender freund von Kolmanse noch zu einen fiel hochern stand von Got ervordert wolt ich mir auch etwegen des sofiel mer erfreuen.

Wunsche herumb peden Ewern Lieben zu solcher erhohung auch dy grosse gnad und erleuchtnus Gottes des Heil[igen] Geistes der pede Euer Lieb in seinen wegen leiten wol und dy gnad verleihen, dar die ernstliche lieb, frid und eintracht und also unssern gnedigsten hern gehorsam und wolfart erwnsche gotlichem namen zu ere gemeiner cristenheit und allen di[sen] landen und leuten zuerparmung gotliches reichs der hegste namen und seligs[te] ervolge und zweifel gar nicht dy gnad Gottes wurd mit Euer Lieb sein dar durch alleint dy vorige zuneigung erhalten, besunder auch alle lieb und freunt[scha]fft auch nachparlicher willen wunschen und dy gunstige und freuntliche z[une]igung zu unssern dagen meiner erloschen den das sol sich Euer Lieb newlichen ... zu mir versehen, das mein gemale mir auch noch nit anderst gestanden u... stehet, den wo ich Euer Lieb in allen zimlichem und ernstlichen fiel freuntlichen und nachparlichen willen erzeigen kunt und wust und also freuntlichen zudinen, das ich ... eren anderst durch meinen eigen firwitz und zunotung erfunden wolt, werden.

Wol den ane zweifel dis fridsamb gemute aus sundern gnaden Gottes herflo... so pit ich meinen liebsten Got durch Cristum er wolle uns allen in solchem gne[dig]lich erhalten und an mir den mangel nit sein lassen wy ich auch an sein... gotlichen gnaden gar nicht zweifel und sol sich Euer Lieb zu einer aller gutwill[igen] freuntschaft und dinst vertrosten, wy ich den dem erenfesten und edeln hern A[ch]acio Czemen, Danzker kastellan, yn weitter Euer Lieb auch muntlich anzuzeigen gepot[en] den Euer Lieb auch also von meinent wegen glauben sol yn in sol aber ab denen amptleut aber verwanten zu peder seit was unnachparlichs des ich doch ... treffen wil und pey meinen amptleuten sowol muglich darvor sein dort sy ... ursach gewen sollen ferfile so er sich ein ieder das selbige mit freuntsch[afft] wie es sich gepuret. Wil mich beschlislich gantz und gar Euer Lieb erpitens getros... und daran gar nichts zweifeln das sich Euer Lieb zu mir auch versehen sol.

Be... so mich hiemit in Euer Lieb lieb und freuntschafft wunsche unn pitte auch Euer Lieb Got den allmechtigen langewiche gesuntheit / und alles was Euer Lieb zu sel und ... amt nutzen. Mein liebste gemahel ist hoch erfreuet, das Euer Lieb so nahend zu u[ns] kummen, wunscht fiel gluckselige wolfart mit freuntlicher und zimlicher erpit[en] befilet sich Euer Lieb irem freuntlichen und lieben peichtvattern.

Datis ebendes Nei[den]purgk, den 25 Octobris anno 1537.

Euer Lieb gutwilliger freunt und nachpar Albrecht marggraf in Preussen herczog etc.