Dem durchlauchtenn, hochgebornenn fursten und hern, hern Albrechten, / von Gots gnadennn marggraff zu Brandenburgk etc. und in Prewssen hertzog etc., unserm hochgunstigen, lyben hern und freuntdt

Durchlauchterr, hochgebornerr furst, hochgunstiger, lyber her und freundt. / Unser freuntliche, wÿllige dinst zuvoran. /

Unser dyner ÿst nechtenn von koniglichem hoff Kraka wÿder an uns gelangt / und under andrem mÿtgebracht, / das konigliche maiestet an ÿren fussen wÿderumb zu guther gesuntheÿtt komen ÿst / mÿt mererer antzeÿgung, / das ir maiestet dÿ hende swach werden. / Got der almechtig wendes zum besten etc.

Wir bedancken uns auch gen Ewer Furstliche Durchlaucht uff dass fleÿssigst / vor der selbtennn eÿgen handtschreÿben, / dorÿnnenn wir sunder zugeneÿgte gunst zu uns gefurt, / dÿ wir unserm vormugenn nach / gern wolthen freuntlich und dinstlich / beschulden. / Bÿtten uns entschuldigt zu habenn, / das wir nicht wider mit unser handt geschrÿbennn. / Es ÿst uns an der zeÿtt / dÿss mhal / abgangen etc. Sunst hab wir nichts von zceÿtung uberkhomennn, / allein, dÿ hirein, / abkopirt, / geslossen etc., himit wir Ewer Furstliche Durchlaucht, in der gunst wir unss thun befelhenn, / Goth dem aller hochstennn bÿtthende, Ewer Furstliche Durchlaucht zu langen zceÿthenn in guther gesuntheÿt und gluckseliger regirung wolde erhalden. /

Datumm auss unserm sloss Heÿlsberg, XXII Novembris M D XXXVIII.

Ioannes, vonn Gots gnadennn bÿschoff zu Ermelanndt