Hern Kostken

Unsernn etc.

Wir habenn negst das getrencke von Ewer Herrlichkeit erhalten, / do vor wir freuntlich dancken, / und ist uns fast lieb, / das Ewer Herrlichkeit disse zceit an koniglichnn hoff sich zu begebenn / vorgenomenn. / Dieweil wir dan wissenn, das Ewer Herrlichkeit dem edlen, ernfesten hern Micheln Szelislawski, Colmischen underkemerer, / und dem ersamenn hern Jorgen Moller mit sonderer freuntschafft gewogenn, / hab wir vor beide in iren anligenden sachen / dem hochwirdigen hern bischove zu Ploczko, / des Reichs underkanczler, mit fleis geschribenn, ouch uns uff Ewer Herrlichkeit referirt, / bittende bey in das beste zu thun, / unser ouch freuntlich nicht zuvorgessenn etc. Wir haben unsermm besondren libnn Niklas Plotowski etliche gewerbe an Ewer Herrlichkeit zu brengen / mit gebenn, / in den sich wolde Ewer Herrlichkeit, / wie wir uns zu der genczlich vorsehen, / freuntlich gen uns unbosvert erczeigen. / Wor inne wir wider umb Ewer Herrlichkeit, / die wir gotlichenn gnaden befelenn und ein glukseligen weg und widerkumfft wunschenn, / vil wilferigheit und gefallenn mugen beweisen, / sein wir erbottig. /

Datum aus unserm slosse Heilsberg, XII Septembris 1542.