Dem Durchlauchten Hochgebornen Fursten und Herren, herren Albrechten, von Gotts genaden margraff zw Brandenburg, in Preussen, zw Stettin, Pomern, der Cassuben und Wenden hertzog, burgraff zw Nurmberg unnd furst zw Rugenn, unserm hochgunstigenn, liebenn herrenn unnd freundt

Durchlauchter, hochgeborner furst, / hochgunstiger , lieber herr unnd freundt. / Unnsernn freuntlichen, willigenn dienst zuvoran. /

Vor die zwgeschickten zeÿtungen was den Katzianer und andere welt handel belangt, / die an Euer Furstliche Durchlaucht durch unsern alten hoffbruederr Niclas Niptzitz gekhomen, / thu wir uns gen Euer Furstliche Durchlaucht freuntlich bedancken. / Vergleichen sich nicht mit denn, die wir nechst erhaltten, / zw Rom den XXVIII Septembris geben, / darinnenn wardt angetzeiget, / wie das keÿserlicher majestet, des konigs von Franckrich thochterr zum ehegaten solt habenn, / ist dan in zehenn wochen solche geschwinde und uncristliche vorenderunge geschehen. / Die mues princeps mundi huius habenn zugericht, / da von im kurtzen alles an tag wirt khomen etc.

Gestrige tages erst hab wir von den herren konigklichen rethenn iren rath / unnd willenn, wie an konigliche maiestet, unsern allergnedigsten herrenn, in den sachenn, die Dennemarcken und uns alle angehenn, / zw schreÿben seÿ, entphangen, / und diesen tag mit unsern schrifftenn / unnd form, hie beÿgelegt, eÿner instruction, / wie koniglicher bott an keÿserliche majestet sol abgefertigt werden, / unsern diener an koniglichen hoff geschickt. / Was uns der widerumb zw anthwurt wirt ein bringenn, wollen wir Euer Furstlichen Durchlaucht mit den ersten lassenn wissenn, / der wir und allen irnn verwanten freuntlich zw dienenn und alles gutts zw fordernn geflissen sein und willig. /

Datum Heÿlsberg, 13 Decembris M D XXXIX.

Ioannes, von Gotts genaden bischoff zw Ermlandt / qui supra manu propria