Reverendissimo in Christo Patri et Domino, domino Ioanni episcopo Varmiensi etc., domino suo gratioso

Post humillimam servitiorum meorum commendationem.

Reverendissime in Christo Pater et Domine, domine gratiose.

Si Reverendissima Dominatio Vestra prospera valetudine esset et in omnibus illi ex animi sui sententia succederet, est, quod vehementer gaudeam. Reverendissimam Dominationem Vestram latere nolo nuper in diaeta Pragensi ab omnibus statibus totius regni et coniunctarum provinciarum sacrae Romanorum regiae maiestati, domino meo clementissimo, certum et satis amplum subsidium pecuniarium contra immanissimos hostes crucis, salvatoris nostri, Turcas promissum esse. Quo non contenta Romanorum regia maiestas, sed omnes status, cum regni Bohemiae, tum reliquarum incorporatarum provinciarum [pro futura aestate (quantum intellegere possum) ad se in campum evocatura est. Inter quos et reverendissimus dominus episcopus Vratislaviensis, dominus meus gratiosus, tamquam supremus per utramque Slesiam capitaneus haud immunis ab hac expeditione erit.

Cum vero et ego in servitio suae reverendissimae dominationis sim et cancellariae, licet indignus, praesim, mihi una proficiscendum, Deo volente, erit. Quandoquidem autem equis non usque adeo instructus sim et sciam Reverendissimam Dominationem Vestram equis in episcopatu istic suo etiam pervenientium abundare, Dominationem Vestram Reverendissimam pro sua in me gratia singulari etiam atque etiam oro et obtesto[r], dignetur mihi aliquo equo ad hanc expeditionem prospicere. Id etsi immerito a Reverendissima Dominatione Vestra peto, a qua tot antea oneratus sum beneficiis, ingenui tamen Reverendissima Dominatio Vestra hominis esse novit, cui quis multum debeat, plus debere velle.

Quare factum est, ut verecundia propulsa et a necessitate victa non dubitarim ad Reverendissimam Dominationem Vestram hac in re confuge[re] et opem suam implorare. Certe accedet hoc beneficii ad cumulum beneficiorum in me antea collatorum et maiori adhuc aere alieno quam antea Dominatio Vestra Reverendissima me sibi obstrictum reddet. Quodque vicissim de Dominatione Vestra Reverendissima et tota sua familia promptissimis meis servitiis et obsequiis promereri studebo.

Cuius gratiae me etiam atque etiam commendo, gratiosum responsum cum praesentium ostensore exspectans. Deus optimus maximus Reverendissimam Dominationem Vestram quam diutissime sanam et felicem conservet.

Datae Nissae, vicesima die mensis Februarii anno etc. 1545.

Reverendissimae Dominationis Vestrae deditissimus servitor Martinus Nibbschicz canonicus Vratislaviensis etc. scripsit