Reverendissimo in Christo Patri et Domino, domino Ioanni Dei gratia episcopo Culmensi, administratori Pomesaniensi et ad episcopatum Varmiensem postulato, domino meo clementissimo

Post humillimam perpetuae meae fidelitatis et obsequiorum commendationem.

Reverendissime in Christo Pater et Domine, domine clementissime.

Heri hora circiter quarta pomeridiana ex Colmense redii, quo me litterarum gratia, quas, ut spero, pro voluntate Paternitatis Vestrae Reverendissimae conscriptas eidem mitto, contuleram, humillime a Paternitate Vestra Reverendissima petens informari, quid tandem mihi faciendum erit, si pecuniae per me ipsum capitulo ferendae, an aliquo alio mediante internuntio mittendae erunt etc.

Descenderam et tum exiens in Colmense, Thoroniam volens rescire, si scatula iam parata esset. Reperi tamen eam necdum propter gravem domini Ioannis Iawr, qua decumbit, infirmitatem, paratam, quamvis iam parari inceptam esse. Qui, quamprimum convaluerit, se omnem impendere promisit operam, ut eam cumprimis paratam Paternitas Vestra Reverendissima opera domini Iacobi Ludovici, qui humillima servitia una cum sua uxorcula Paternitati Vestrae Reverendissimae offerri instantissime, quod cum ea, qua summa possum, facio reverentia, petiit, habeat.

Litteras his iunctas mihi una cum barilla olei olivae et vasculo damascenarum, quae omnia Paternitati Vestrae Reverendissimae per exhibitorem praesentium mittuntur, obtulit, petens impense, ne illi Paternitas Vestra Reverendissima succenseat, quod praedicta non usque adeo cito, ut par erat, essent transmissa, erant enim Petricoviae, unde XXIII huius Thoroniam rediit, non per modicum tempus ipso ignorante deposita in ipsoque suo discessu ei per dominum Iostum Ludovicum reddita. Et quamvis sibi persuadeat Paternitatem Vestram Reverendissimam non latere, nihilominus a me postulavit, ut Paternitati Vestra Reverendissimae scriberem reverendissimum dominum Cracoviensem, dominum Choinski cancellarium Regni Poloniae, tribus dumtaxat decumbentem diebus, XI huius viam esse ingressum universae carnis et locum eius suffectum dominum palatinum Posnaniensem, quam dignitat[em] palatinatus, dominus Latalski, reverendissimi domini archiepiscopi frater, obtinuit, domini denique Oleschniczki in episcopum Posnaniensem, Tarlo in Cuy[a]viensem et Maczyowski in Premisliensem essent designati etc.

Ceterum, Reverendissime Domine, erat hic apud me paulo ante honorabilis dominus Ioannes Staer in Ssenecke plebanus, qui mihi hanc, quam iniunxi, obtulit ad ecclesiam in Grodziczno praesentationem, petens humillime, ut illum hic auctoritate sua commitere velit ad praedictam ecclesiam. Si ita illi visum fuerit, investire simul me informare non gravate Paternitas Vestra Reverendissima dignetur, si aliae se praesentationes obtulerint, quomodo cum illis erit procedendum.

No[lui] etiam Paternitatem Vestram Reverendissimam latere esse in Ląkoess quendam dominum Mathiam Lichotka, cui etiam simile nefas, quod paulo ante patuit, propter eius inopiam Paternitas Vestra Reverendissima dimiserat. Qui coctrice sua vili et antiquo scorto puerum procreavit. Quid cu[m] illo faciendum erit, Paternitas Vestra Reverendissima describat.

Quod reliquum est, me Paternitati Vestrae Reverendissimae, ut domino meo clementissimo, humillime commendo. Deumque precor, ut eandem quam diutissime sospitet prosp[e]retque in omnibus.

Ex castro Paternitatis Vestrae Reverendissimae Lubaviensi, XXVII[I] Martii anno Domini M-o D XXXVIII.

Eiusdem Paternitatis Vestrae Reverendissimae obsequentissimus servitor Baltasar a Lublin