GStAPK, HBA, C1, No. 1129, f. 2unnum

Den edlenn wolgebornen herren / erbaren erenvhestenn / furst(liche)r d(urchlauch)t zu Preussen stadthalteren und heimgelassenen rethen zu Konigsbergk / unserenn besunderen gutten freundenn

GStAPK, HBA, C1, No. 1129, f. 1unnum

Unnseren freuntlichen grus und alles gutts zuvoran / edle volgeborne herren / erbare erenvheste / besundere gutte freunde. /

Das wir den erbarn Berndt Konseck / auff seiner freuntschaft dienstlichs ansuchenn ein monat lang begleitet / und volgende unser furschrife ann F(urstlich)e D(urchlauch)t / darinn wir solchs derselben vormeldet / gegeben / ist der sachen gelegenheit nach / wie die uns von seiner freuntschafft vorbracht / und das wir gerne einn ideren furderen / und bey dem / darzu er fueg und recht hatt / erhaltenn helfenn / von uns gescheen. / Vorsehenn uns derwegenn / das hiedurch nichts / das Furst(liche)r D(urchlauch)t und der nachparlichen freuntschafft widdrig sein möchte / von uns sey zugelassenn. / Wodurch wir auch vorursacht worden / weil uns gedachter Konseck aufs new ersuchet / und angetzeigt / wie ihm ferner von E(uer) H(errlichkei)t / und Euch andern / ein thag zur antwortung gelegt were / den er auch zu haltenn bedacht / ihn auf sein vleyssige bitte noch ein monat zugeleiten. / Wo aber E(uer) H(errlichkei)t und Ihr anderen / dis Furst(liche)r D(urchlauch)t und der nachparlichen freuntschafft entkegen zu sein achten / und uns das ankunden wurden / wollen wir ihm gedachts gleid aufsagen / und uns der gestalt in diesem fhall kegen Furst(lich)e D(urchlauch)t ertzeig(en) und halten / damit obgedachte nachparschaft nicht durch uns geirret / sunder vielmehr vormheret und befestigt werde. / Welchs sich E(uer) H(errlichkei)t / und Ihr anderen / die wir gottlichen gnaden mit langweriger gesuntheit bevelhen / gewisse zu uns vorsehen mugen. /

Dat(um) aus unserm schlos Heilsbergk den XV Augusti MD XLVIII.

Ioannes vonn gottes gnadenn bisschoff zcw Ermlanndt

GStAPK, HBA, C1, No. 1131, f. 2unnum

Den edlenn wolgebornen herren / erbaren erenvhesten Furst(liche)r D(urchlauch)t zu Preussen stadthaltern und heimgelassenen rethen / zu Konigsberg / unnsern besunderen guttenn freunden

GStAPK, HBA, C1, No. 1131, f. 1unnum

Unnsern freuntlichen grus unnd alles guts zuvoran. Edle Wolgeborne herrnn erbare erenvheste besunder gutte freunnde. /

Wir lassenn unns wolgefallen das E(uer) H(errlichkei)t unnd Ihr annderen / an unser negsten andtwurth auff dersulben schreyben / wegen der gleytung Berndt Consecks / ein genugen tragen / dem wir auch also wollen nachsetzenn / unnd unns dergestalt kegen gedachtem Conseck erczeigenn / damit nichts das die nachparliche freundtschafft zcwuschenn R(urstliche)r D(urchlauch)t unnd unns muge hinderenn / im inn unnserem bistumbferner nachgegebenn ader zugelassenn werde / unnd seindt E(uer) H(errlichkei)t unnd Euch annderen idere zceit zufurdirn unnd ihnenn viel guts zuczufugenn gewogen / das wir densulbenn zur freuntlichenn andtwurth / nicht habenn wollenn vorhaltenn. /

Datum aus unserm schloss Heilsberg den XXVII Augusti M D XLVIII.

Ioannes vonn gotts gnadenn bischoff zu Ermelanndth