APG 300, 53, 319, p. 4

Den ersamen, namhafftigen hern burgemeÿster und rathmane der ko(nigliche)n stadt Dantzke, / unsern gunstigen freunden

APG 300, 53, 319, p. 1

Unsern freuntlichen grus und alles guten zuvoran. / Ersame, namhafftige hernn, gunstige freunde. /

Unser underthan und lÿber getrawer, der ersam Lorentz Thideman, burgemeÿster unser stadt Wartenburg, / hat uns klagweis zuvornhemen geben, / wÿ im Ludiken Fus, / der zuvorn E(wer) E(rbarkei)t mitburger gewest / und ÿtzundt zum Elbing wonhafftig, / durch seÿnnen dÿner mit nhamen Hans Hanneman etlich flax hat abgekaufft, / vor den er ÿhm hat gut gesagt und doruber sein vorschreÿbung gelassenn, / dovor er ihm noch biss in dÿ sechsshundert marck hinderstellig schuldig blybenn, / wÿ sein guter schein und beweÿs mitbringt. / Dÿweÿl wir aber bericht, / das gedachter Hans Hanneman unser eÿgen und pawer ÿst, / pirtig auss unserm dorff, Wolffsdorff genant, / hab wir im etlichen flax in unser stadt Wormnit behemt / bÿs so lange er von uns seÿner pflicht halben scheÿde / und gen unsern, den er auch schuldig, / nemlich gedachtem unserm burgemeÿster von Wartenberg vor uns gerecht werde. / APG 300, 53, 319, p. 2 Das hab wir E(wer) E(rbarkei)t uff der schreÿben, an gedachter unser stadt rath Wartorenÿt(en)(?) negst gegeben, zum antwurt gutlicher weÿs nicht woldt vorhaltenn(n). / Gotte befolhen. /

Datum aus unserm slos Heÿlsberg, den XXVIII Iunii M D XXXIXt(en).

Joannes, von Gots gnaden byschoff zu Ermelandt