Dem Durchlauchtigen Hochgebornen Fursten und Herren, herren Albrechten, von Gottes gnaden marggraffen zu Brandenburg, / in Preussen, zu Stetin, Pommern, / der Cassuben und Wenden hertzogenn, / burggraffen zu Normberg und fursten zu Rugen, / unserm hochgunstigen lieben herren und freunde /

Durchlauchter Hochgeborner Furst, hochgunstiger lieber her und freundt. /

Unsere freuntliche und vleiswillige dienste zuvoran. /

Wir haben Eurer Furstlichen Durchlaucht schreiben / neben dem klepper, / so wir derselben diener hievor geliehen, / gestrigs tags erhalten / und achten vor ubrig / das uns Euer Furstliche Durchlaucht so fast freuntlich derwegen thun dancken, / dan Eurer Furstlichen Durchlaucht in grosserm und mehrem zu dienen / seint wir in alwege gevlissen und gneigt. /

Den klepper aber, / so ir diener kranck bei uns vorlassen / hab wir bisher mit allem vleis zuwarten bevolhen, / schicken den auch / so gut als er hat werden wollen / hiemit widderumb zu Eurer Furstlichen Durchlaucht, in der gunst wir unns treulich thun bevelhen. /

Datum Heilsperg, den XX tagk Aprilis MDXLIIII. /

Ioannes von Gottes gnaden bischoff zu Ermlandt /