GStA PK, HBA, C1 No 716, 4 unnumbered

Dem durchlauchten, hochgebornen fursten und herren, hern Albrechten, von Gots gnaden marggraff zu Brandenburg, / in Preussen, zu Stettin, Pommern, / der Cassuben unnd Wenden hertzog, / burggraff zu Normberg und furst zu Rugen, / unserm hochgunstig(en), lieben herren und freunde

GStA PK, HBA, C1 No 716, 1 unnumbered

Durchlauchter, hochgeborner furst, hochgunstiger, lieber her und freundt. / Unsere freuntliche unnd vleiswillige dinste zuvoran. /

Wie wir negst Euer F(urstlichen) D(urchlauch)t geschrieben von wegen der besichtigung des molbaues an unsern bodem / und uber die helffte der Passerien gelangend, / hab wir E(uer) F(urstlichen) D(urchlauch)t zu freuntlichem dinst und gefallen, / die dis mal mit wichtigern gescheften irer grentzen beladen, / mit unserm w(irdigen) capittel gehandelt, / und solch zusammen kommen nach E(uer) F(urstlichen) D(urchlauch)t beger vorlegt bis in die zukunftige faste, / in welcher solcher baw von beiden teiln uff bekueme zeit / sal den augen underworffen und besichtigt werden, / freuntlich in unserm unnd unsers w(irdigen) capittels nahmen dinstlich bittennde, / wolde uber angestelte zeit kein weitern vorzogk in dieser sachen lassen wachssen, / domit allenthalb lieb und einigkeit under E(uer) F(urstlichen) D(urchlauch)t und unsernn underthan muge erhalten werden. / Wie uns auch negst E(uer) F(urstliche) D(urchlauch)t freuntlich und nachbarlich warnende von wegen der mortborner geschrieben, / des wir uns gen E(uer) F(urstliche) D(urchlauch)t mit vleis bedancken, / hab wir solchs in unsern amptern, stedten und flecken idermenniglich lassen ankundigen, / uff solche bose leut und zeichen gut achtung zuhaben, / und so der etliche wurden uberkommen, / sal ane rath und mit wissen E(uer) F(urstlichen) D(urchlauch)t mit in von unsern ampt tregern nichts werden vorgenommen. / Dieweil aber E(uer) F(urstliche) D(urchlauch)t anzeigen, wie bis in dreyhundert dieser gotlosen menschen sein gerechtfertigt, GStA PK, HBA, C1 No 716, 2 unnumbered so solt jo offenbar werden, / von was personenn solch erschrecklich mortbrennen wer zugericht. / Hat hirinne E(uer) F(urstliche) D(urchlauch)t etwan ein wissenschafft, / uns mit zuteÿlen gantz freuntlich bitten. / Wirt uns auch von des lesterlichen handels treybern was zukommen, / wolle wir E(uer) F(urstlichen) D(urchlauch)t, der wir von Gothe dem almechtigen alle seligheit wunschen und bitten, / vortraulicher weiss nicht vorhalten. /

Dat(um) Heilsperg, den XXVII Nouembris M D XL.

Joannes, von Gots gnaden bischoff zu Ermelandt /