Dem erwirdigenn ihnn Goth, unserm besondernn lieben freundt und nachparn, herren Johansen bischoffenn zu Ermelanndt

Unnser freuntlich dienst und was wir liebs und guts vermogen zuvor.

Erwirdiger ihn Got besonder lieber freunth und nachbar. /

Wir mogen Euer Lieb freuntlicher meÿnung nicht bergen, / das uns der ernvest, achtbar unnd hochgelert unnser cantzler, rath unnd lieber getrewer Hans von Creÿtzen beÿder rechte doctor allerley so Euer Lieb ihme an uns zutragen / auferlegt / eingebracht unnd nach nodturfft erzelt, / worauff wir dan Euer Lieb ihn erwegung der hendel umbstendigkeit, / die wir ihr nicht gerne weitleufftigk ausgebreÿt wissen wolten, / nicht schrifftlichen sonder durch vortraute botschafft beantworten wollen, / weren derhalben auch woll geneigt gewesen, / obgedochten unsern cantzler widerumb an Euer Lieb zufertigen, / so fhallen uns doch itziger zeyth solche hendel fhur. / Darob wir seÿne person zuverschicken abgehalten. /

Weil aber gegenwertiger der ernvest unnser cemerer, rath und lieber getreuer Christoff von Creytzen bey uns nicht mynder dan bemelter unnser cantzler in vertrawen gehalten und ist, / haben wir demselben unnser gemuths meÿnung Euer Lieb von unsertwegen ihnn hohem vertrauen anzutragen / unnd zueroffnen aufferlegt, freuntlich byttendt Euer Lieb wolle ihme ihnn solchem seynem anbringen als uns selbst volkommen glauben geben, / mit der freuntlichen nachbarlichem unnd gunstiger wilferiger erzeigung, / wie wir uns zu Euer Lieb ungezweiffelth getrosten unnd vorsehen. / Das seyndth wir umb dieselb in allen freuntlichen nachbarlichem willenn zuvordienen urbutigk.

Datum Konigspergk, denn XI Octobris anno 1541.

Von Gots gnaden Albrecht marggraff zu Brandenburgk ihn Preussen, zu Stettin, Pomern, der Cassuben und Wenden hertzogk, burggraff zu Nurenburgk unnd furst zu Rugenn etc. manu propria subscripsit