Denn ersamen unnd namhafftigenn hern burgermeister unnd rathmann der koniglichen stadt Danntzigk, / unserenn besundern, guten freunden

Unnsern freuntlichen grus unnd alles gutts zuvorann. / Ersame, namhafftige herrenn, / besundere, gutte freunde. /

Wir habenn gesternn im heiligen ostertage / Euer Erbarkeit schreiben, / neben dem allem, / das darinnen gelegenn, / erhaltenn / unnd uns lassenn vorlesen, / daraus wir Donats Sachssenn / etc. ungrundtlich unnd mutwillig vornhemen / unnd zu nötigung, / so wol zu Euer Erbarkeit, als zu unnser kirchenn, / auch zu der Cron und allenn koniglichen landenn / wol habenn eingenhomen. / Wie aber der edle, erenvheste Friederich vonn der Olsenn / unnd der vonn Schwartzburg / sich der sachenn, / Donate zu gutt, / an nhemen, / gibt unns nicht unnbillick wunder etc. Was Donat selbst angehet, / ist Euer Erbarkeit unnd dem gantzenn lannde unnvorborgenn, / nemlich wie er sein wesenn / unnd handel getriebenn / unnd mit wasserley gestalt practikeig ist umbgangen etc. / Weil dann die zukunfftige thagfart vorhandenn, / ist unser freuntlich bitte, / kein vordriss zu tragenn, / des anstands bis auf die zeit mit Euer Erbarkeit geschicktenn / inn gemeynem rath / was zum antwurt gehorig / unns zu bereden. / Unnder des muge wir auch unserm wirdigenn capitel / alles, was uns Euer Erbarkeit zugeschickt / zu uberlesenn, / nicht vorhaltenn, / welchs wir unvorruckt ghenn Marienburgk / mit götlichenn gnadenn wollen mitbrengenn / unnd gerne wissen, / ob unsere vorschriffte Euer Erbarkeit worinne sein furderlich gewesenn, / hiemit dieselbtigenn Eure Erbarkeit gotlichen gnaden bevolhenn. /

Datum aus unserem schlosse Heilsberg, denn XXVI Aprilis / am ostermhonthage / M D XLVI.

Joannes, vonn Gottes gnadenn bisschoff zw Ermelanndt /