Dem Hogwirdigestem in Got Fursten und Herren, / herren Joan bisschofe czu Ermlant, / unszrem genedigestem herren.

Hogwirdigester in Got Furst, genedigester herre.

Unszre gantcz demutige und beraidtwyllige dinste seint Ewer Hochwirdige Gnaden / in alle czaidt gantczfleysig entpholen.

Gnedigester Herre.

Szo denne in negsten landesgespreech / den hoggeprisennen stenden der koniglichen maiestet czu Polen unser allmechtige herr / dieszer lande Preussen rete voranlaset und beslossen, / das eyne ider seine aufferlegte taxe / czur vorehrunge des hogwirdigesten in Got fursten und herren, / herren Samuelis bisschofen czu Chelmen der loblichen Cronen czu Polen undercanczeler / auszgestympt bey Ewer Hochwirdige Gnaden widder und abeczulegen. / Domite die gancze summe von Ewer Hochwirdige Gnaden / an denselbigen kommen mocht. / Deme alle nochczukommen haben wir die aufferlegte taxa als funffczig gulden czu dreysig groschen jegenwurtigem czayger Greger Schonwalt daergelegt / dieselbige ferner Ewer Hochwirdige Gnaden czuvorraichen. /

Wusten wir Ewer Hochwirdige Gnaden (die Got lange czaidt g<e>sunt und szelig friste) file angenehme dinste czuthuen, / deynnen szal bey uns widderfleisz noch mühe abegeen.

Datum am hailigen Pfingest mittwoch, den 8 tag Iunii noch der gepurdt Iesu Christi unsers aynigen Hailandes 1541.

Ewer Hogwirdigesten Gnaden dinst und beraidttwilligen burgermaystere und radtmane der Koniglichen Stadt Thornn