Reverendissimo in Christo Patri et Domino, domino Iohanni Dei gratia episcopo Warmiensi, domino suo gratiosissimo ac singulari studio honorando

Reverendissime in Christo Pater et Domine, domine gratiosissime et singulari studio honorande.

Praemissa obsequiorum meorum ob[ni]xa in gratiam Reverendissimae Dominationis Vestrae commendatione.

Incolumitatem praesentem Reverendissimae Dominationi Vestrae his scriptis meis duxi intervisendam, quam eidem Dominationi Vestrae Reverendissimae faustissimam semper magnopere cupio et longaevam.

Ceterum Reverendissimae Dominationi Vestrae decrevi innotescendum rumore ad me delatum esse nonnullos ex dominis terrarum Prussiae eo parare animum suum, quod forsan contra me in futuro conventu Prutenico tractatus facere contendunt, molesto ferentes supercilio, quod sacra regia maiestas, dominus noster clementissimus, de gratia sua capitaneatum Gnewensem mihi promittere dignata est, quum in terris Prussiae possessiones non haberem.

Quae cum me res ita audit, ad Reverendissimam Dominationem Vestram, dominum et fautorem meum gratiosissimum, cumprimis hoc in negotio confugiendum putavi. Cuius erga me benignitas et gratia tantum testata est, quod in illa constanter semper fiderem, qua etiam mediante capitaneatum Mariemburgensem assecutum me fore profiteor et in multis aliis candidam semper erga me dignavi. Proinde Reverendissimam Dominationem Vestram, dominum meum gratiosissimum, exoro, ut, si quid tum in his comitiis contra me in hoc facto commemoratum fuerit, pro sua in me gratia et benignitate complanare dignetur et animos eorum, qui ea in re malevolentes mei esse vellent, moderare. Quam benignitatem Reverendissimae Dominationis Vestrae omni benemerendi studio sinceriter mereri studebo.

Cuius gratiae me et hoc negotium meum ex animo quam diligentissime recomitto cupiens, ut Reverendissima Dominatio Vestra diu felicissime valeat et me obsequentissimum suum diligat.

Ex Ploczka, die Parascheves sancto anno Domini M-o D-o XLVI-o.

Eiusdem Reverendissime Paternitatis Vestrae servitor pallatinus Plocensis manu propria subscripsit